Urbano Poulus (Bambam) Marcera
Musician/ Mandolin player
Músiko ,Tokadó di mandolin
*April 2nd, 1948
+October 25th, 2014

Kralendijk, 07 di novèmber 2021

Urbano Marsera a nase 2 di aprel 1948 na Boneiru. Bambam, nos tuman stimá tabatin 11 ruman. Unu a fayesé i a keda 5 ruman muhé i 5 ruman hòmber. Bambam su ruman hòmbernan tur tabata toka i kanta.

Ku su 5 aña Bamban a bai skol i ora skol kaba Bambam tabata kore bini kas pa kome purá purá pa despues hasi su lèsnan kaba e ta bai toka riba kaha, hèmber i heru di strika di antes i eseinan tabata saka musik. Bambam tabatin hopi amigu ta bin buské pa bai hunga fli, tròm, pèiku, pero Bambam tabata bisa su amigunan, “Aworaki mi no por.”Bambam su kabes tabata pa músika.

Bambam su tata Chepea tabata tin un kitara Haway ku ela bini ku ne for di Merka. Bambam a siña toka e kitara Haway masha bon mes. Bambam a kaba skol di Rincon i a bai ambachtskol na Playa, einan ela siña traha meubels. Bambam a slag ku un bunita rapòrt, pero Bambam no por a haña trabou aki na Boneiru. Bambam a kuminsá siña toka kuarta i mandolin. Papa Molina tabata bin toka sinfonia. Bambam a mira i tumele foi Papa i asina ela kuminsá toka sinfonia.

Bambam a drenta trio di Boy Molina i Merehilio pa despues Bambam a drenta grupo di stilbènt Lasana Kids di Fincho Janga. Despues Fincho tabata tin “Los Diagonales”. Tabata dushi tempu.

Bambam su tata a bai traha na Korsou i a manda buska Bambam pa traha na Korsou. Ku duele na su kurason Bambam a a bandoná Boneiru. Su tata Chepea a disidi di lanta un banda di famia i a yame Tipiko Boneriano. Tabata dushi tempu pa Bonerianonan bibá na Korsou.

Pa despues Bambam a drenta “Tipiko Nos Antias” di baile folklor. Asina Bambam a drenta e famoso banda di Dominico Herrera despues di esei Bamban no tababta tin man pa toka su mandolin ku e tabata stimá. Tambe e banda Tripilichi. Piesa nan hopi konosi si ku Bambam tabata toka ta “Ban Wapa Karnaval” , “Pan Frances”, “Federica (Wals)” i “Altagracia (Danza)”. Su mama Federica i su tata Chepea tabata orguyoso di mira nan yu hòmber toka, Bambam tabata un hende masha trankil.

Bambam a bini Boneiru despues di 8 aña i nan a toka varios kaminda i tambe den Parke Wilhelmina pa “Dia di Arte” ku Fundashon Arte i Kultura tabata organisá. Den parke Bambam a topa ku hopi amigunan di antes. Bambam su wowo a yena ku awa di alegria. Ela bisa mi ku e ta bai Korsou no pa 8 aña sino e ta bai pa prepará su kosnan pa aki 3 luna e ta bèk na Boneiru.

Bambam a bai Korsou, pa dia 7 di òktober 2004

Bambam a yamami i a bisa: “Chichi, mi ta bai prepará algun kos pa bai barká mi lo yama Chichi despues.” Mi no a tende nada mas. Pa dia 23 di òktober 2004 mi a haña un yamada ku a bini un nubia skur riba Bambam su bida.

Dòkternan a lucha pa Bambam su bida pero dia 25 di òktober 2004 Bambam a fayesé. Tabata duru pa famianan, fanátikonan i músikonan tabata tristu di pèrdè un hende manera Bambam. Bamban a priminti tur hende ku e no ta bai pa 8 aña sino e ta bai prepará pa aki 3 luna e ta bèk na Boneiru, Bambam su deseo no a wòrdu kumplí.

Bambam sosegá na pas.

A papia su ruman Jo Albertus Emma Sint Jago pabien huntu ku bo team. Esaki ta un rekuerdo bunita pa Bambam su famianan.

Un danki pa Bambam, un artista di hopi tempu.

(Images courtesy of Ubaldo Anthony.  All rights reserved.)